政Whats噏:議員批政府無心改革公務員制度 對此感失望

2022年08月19日 18:15
東網電視
更多新聞短片
李梓敬建議公務員調薪同工作表現掛鉤。
公務員屢受批評,早前調薪更引起社會熱議。議員李梓敬(Dominic)早前喺立法會提出有關改革公務員制度嘅議員議案,至日前,政府就此提交進度報告。之但係Dominic話報告缺乏新資訊,政府回覆令人失望,完全唔覺得政府有決心改革喇。咁啱佢呢排見到公務員事務局局長楊何蓓茵,於是再作查詢,點知都係失望多次喎。
Dominic指公務員調薪應將工作表現納入考慮因素,更要求政府進一步解釋為何有公務員被勒令退休,同時希望楊何講清楚調查社交平台專頁「公務員secret」嘅進度。不過,楊何認為公務員表現難以一概而論、好難衡量;對於被勒令停職嘅公務員,楊何就話要研究,之後再交代喇。
聽完楊何嘅回覆,Dominic話都係失望,好多問題未得到實質嘅答案,所以要繼續跟進。事實上,立法會喺6月已通過「改革公務員制度,提升政府效能」嘅議員議案,當時都有唔少議員批評公務員無論能力表現如何都薪高糧準,促請政府設立關鍵績效指標,同薪金調整掛鈎,更表示加薪要視乎功勞呀。