政Whats噏：「跨黨派男團」出道　隊名：唔好叫Horror

依家好多男團大受吹捧，今日(21日)又有一隊男團出道喎。叫乜名？佢哋希望唔好係Horror(恐怖)喎。

呢隊男團喺藍田出道，喺一個長者音樂會擔任表演嘉賓。佢哋同小鮮肉扯唔上關係，但全部都係立法會嘅新鮮人，呢隊「跨黨派男團」係「新丁擔當」，包括管浩鳴、梁熙、陳學鋒、李鎮強、梁毓偉同顏汶羽。梁熙喺社交平台貼文，話呢隊未命名嘅男團事前從未夾過，出道首次表演就唱咗《朋友》同《真的愛你》兩首歌，佢話平日嗌咪多，揸咪練歌少，自己唱細聲啲做和音擔當，以免影響整體表現，而李鎮強就係「氣氛擔當」。

佢覺得觀眾嘅反應唔錯，事關見現場觀眾都冇咩人去廁所，所以已經相當滿足嘞，仲話希望下次仲有機會再合作。佢仲話台上嘅鼓手係佢大學室友，室友仲叫埋爸爸嚟彈結他，為長者帶來快樂嘅周日，大讚呢個親子活動唔錯！