政Whats噏：兩年無放過假　葉劉淑儀生日小休一天　

行政會議召集人、議員葉劉淑儀今日(24日)迎來佢72歲嘅生日，雖然身處海外嘅千金因公務繁忙未能回港，但一早就越洋來電問候同送上祝福，即使未能相見，亦感到十分窩心。葉劉亦提到兩年自己無放過假，究竟係「愛定責任」驅使佢咁勤力呢？

葉劉喺社交平台提到，隨着工作愈來愈繁忙，過去兩年，自己未曾正式放過一日假，即使係周末同公眾假期都係工作，今日終於可以小休放鬆一下。之不過，休息過後，佢就指自己聽日會「照常營業」，重新投入工作了。

另外，葉劉都好多謝各路朋友嘅祝福同厚愛，指支持就係最大嘅動力。而身為政黨主席嘅葉劉，亦得到一眾黨友送上鮮花同蛋榚，更有好友送上別出心裁嘅生日禮物，就係是一個戴著口罩嘅人像蠟燭，令佢感到好驚喜兼浪漫，睇嚟葉劉今次生日都好難忘喇！