政Whats噏：陳家珮地辦開張　葉劉乘機問政府拎資源？

又有立法會議員開地方辦事處喇，今次由選委界議員陳家珮獨自首次擔大旗，喺太古服務街坊。同場出席嘅創新科技及工業局局長孫東，就大讚陳家珮嘅表現。之不過，讚還讚，應有嘅資源都要爭取，陳家珮所屬嘅黨主席、議員葉劉淑儀就有以下訴求，唔知成唔成功呢？

葉劉淑儀發言時就笑言孫東比多啲資源佢哋，因為佢哋有咁多年輕人，亦都再三強調推動創科嘅重要性。至於孫東都未有託手踭，指政策需要地區支持，舉例老人家唔識用「紅黃碼」，好多時靠地區人士教，日後會將更多科技資源放落基層。另外，孫東都大讚陳家珮，指同佢喺立法會共事過半年，而佢熟悉地區事務，工作能力好，有深刻印象，好期待佢嘅表現。

至於陳家珮就指希望拓展服務，地辦會陸續有來，又指東區人口眾多，辦事處都收好多求助，包括交通衞生等，最記得嘅就係爭取港鐵無障礙通道，希望為居民追求更多健康環保生活，亦會舉辦唔同類型嘅地區活動同居民加強聯繫。