政Whats噏：近半區會議席懸空形同停擺　麥美娟：運作正常

區議會近半議席懸空逾一年，多區區議會停擺，一係無足夠人數召開大會，一係就泛民建制對峙，主席或副主席選極都選唔到，疫情下區議會可以做到嘅支援更少之又少，可以話處於癱瘓狀態，就連前民政事務局局長徐英偉都曾稱區議會已失效，將具體檢討區議會工作，當時政府亦形容區議會有點殘缺不全。但點知，轉個頭，民政及青年事務局局長麥美娟就認為區議會仍然正常運作喎。

麥美娟上任近兩個月接受傳媒訪問時表示，大會雖然不能召開，或者有些議席懸空，但是根據區議會條例，其實區議會仍然運作嘅。但有個別區議會，例如東區、黃大仙，逾半年連大會都冇得召開，呢個都算正常運作？麥就解釋話區議員仍可進行地區服務，指作為對市民嘅交代，地區服務唔受影響咁話。又提到新政府上場2個月，大家應該睇到喺地區工作嘅投入及力度大咗喎。

佢又指檢討區議會產生方法未有定案，不排除會讓分區、滅罪及防火委員會成員加入日後嘅區域組織，又承認青年問題複雜，會邀請不同政治立場的青年深度訪談，聆聽佢哋意見。