政Whats噏：陳家珮梁熙議辦開正隔離　兩大政黨「打對台」？

繼上星期喺康山開咗個新辦事處，選委界議員陳家珮今日(2日)又喺筲箕灣開辦事處喇，今次仲要開正喺議員梁熙同管浩鳴嘅辦事處隔離，實行打擂台咁話喎，唔知佢哋會唔會為咗幫市民而爭崩頭呢？

話說陳家珮就喺愛東邨開左個辦事處，咁啱開正喺梁熙同管浩鳴隔離，佢就話唔係專登開喺隔離嘅，個位純粹係咁啱抽返嚟，唔係「打對台」，又話新選制下大家都係互補，始終喺大是大非嘅問題上，大家都係有溝通咁話，相信無咩議題會有太大衝突喎。佢相信大家唔會「爭生意」都係服務市民，而且兩個黨熟悉嘅範疇都唔同。加上，地區服務都係差唔多，相信咁樣擺埋一齊「係協同效應大於競爭」。陳家珮又話，有時1個政黨把聲唔夠，多個政黨一齊發聲，會好啲咁話喎。

議員葉劉淑儀就話開心可以喺呢度開新嘅辦事處，慨嘆過往參選港島區，又嚟過好多次愛東邨都無辦事處提供服務，好彩依家有喇！佢仲話希望辦事處開幕之後可以為附近嘅居民做多啲工作喎。