政Whats噏：沙田區會爆疫　許立燊今確診　共3區議員中招

沙田區議會爆疫！繼該區議會主席麥潤培上周三(7日)確診新冠冠肺炎後，至今已再有兩名區議員中招，而呢個區議會只剩得9個區議員，就已經有3個確診，即係佔咗三分之一，其餘嗰6個區議員真係岌岌可危呀！

話說麥潤培上周二(6日)出席咗「文娛康體及社區設施管理事務委員會」會議後，翌日就發現中招，另一出席會議嘅區議員鍾禮謙尋日(10日)亦喺社交平台貼文，話自己終於成為新人類。事實上，原本許立燊比較高危，事關佢喺會後曾駕車接載麥潤培。仲記得許當日仲喺社交平台貼文寸麥潤培，話「可能因身高差及強健體魄」，又強調自己「一切並無異常」添！點知相隔5日，寸人嗰個、即係許立燊都中招嘞！佢今日(11日)喺社交平台話，經過幾日嘅一線生活後，最終要加入二線行列，仲會進行醫學隔離，而佢辦事處嘅職員已經做咗核酸檢測，結果係冇感染病毒。

麥潤培同日喺社交平台貼文，話「一個疫症，就睇到成日稱兄道弟的4位，邊3人才是『最真兄弟』」。點解咁講？事關係2019年區議會選舉，包括麥在內4個人以「馬鞍山守護線」出戰馬鞍山嘅議席，當中3個已確診，依家只係差鄭仲恒嘞！佢仲係文康委員會嘅主席喎。

好似被飛出「真兄弟」嘅鄭仲恒似乎心有不甘，亦喺社交平台貼文寸寸貢，話「唉！仲話係兄弟，馬鞍山守護線另外3位議員有咩都唔預埋我啦。主席，偏心，只寵幸許立燊同鍾禮謙，卻冷漠本宮。既然我身體咁健康，就惟有繼續做嘢，冇得休息。當然我每日都會做檢測啦。」跟住佢仲Hashtag話「主席好潺」，而當日開會後佢都有同車嘅，但就冇中招，話自己「百毒不侵」。其實，喺麥潤培確診後，鍾禮謙同許立燊呢幾日都做快測，都係話冇事，但冇耐就中招，睇嚟鄭仲恒都係自求多福喇！

話時話，沙田區議會剩得9個區議員，全部都係呢個委員會嘅委員，即係全部都係高風險人士，依家有3個已中招，其餘嗰6個區議員就係鄭仲恒、衛慶祥、莫錦貴、冼卓嵐、周曉嵐同林港坤，而衛慶祥喺今年3月初亦曾確診。究竟疫情會就咁停落嚟抑或會繼續擴散落去？大家要拭目以待嘞！