政Whats噏:倡部分方艙闢作旅遊景點 姚柏良講真?

20220912
東網電視
更多新聞短片
被謔稱「糟糕灣」嘅竹篙灣社區隔離設施,公眾觀感頗為負面。
雖則話沙灘、廟宇又或者渡輪都可以係旅遊景點,但若果竹篙灣社區隔離設施亦都列作遊遊景點,唔知大家有冇興趣呢?旅遊界議員姚柏良日前出席一個網台節目,期間佢提到早前曾向當局反映,能否提供景點畀業界,例如帶團參觀一下方艙設施。儘管佢強調當中含有打趣性質,但呢個建議嘅出發點其實好嚴肅。原來有苦衷。
疫情反彈,單日確診個案曾連續幾日破萬宗,恐怕實際數字更高,事關有部分染疫嘅市民,寧願匿埋喺屋企都唔向當局申報,理由係擔心被送去方艙隔離。姚柏良話市民染疫但拒絕申報,當中確有道德問題,對公眾衞生安全構成威脅;但又無可否認,市民對方艙嘅觀感頗為負面,覺得裏面嘅配套同條件欠佳,以致產生一旦染疫而被安排入住竹篙灣,變相係一種懲罰嘅印象。
到底被謔稱「糟糕灣」嘅竹篙灣社區隔離設施,係咪好似坊間傳言咁恐怖,形容到好似坐監咁呢?佢話未入過去嘅市民未必掌握實況,其實佢有幾位朋友入過去,當中包括佢一位助理,都話方艙並非好似外界傳聞講得咁差。為咗釋除市民對社區隔離設施嘅疑慮,佢認為不如將部分闢為業界嘅本地遊景點,予參觀嘅市民清楚了解方艙嘅狀況。
咁為方艙拍宣傳片,扭轉市民嘅觀感又得唔得?佢認為未必可行,事關公眾對竹篙灣嘅不良印象深入心坎,要洗脫污名談何容易?佢又話方艙喺硬件上即使未盡人意,但管理上應該窩心一啲、貼心一啲,可以彌補下入住方艙嘅市民心靈。
佢又慨嘆,一日唔恢復人員自由往來,旅遊業一日都無得搞,而業界捱咗差不多3年仍深陷寒冬,即使靠本地遊「吊鹽水」,亦礙於近日疫情回升,本地遊收客日見困難,況且暑假已過,9月開始又迎來本地遊淡季,即使要待第4季至可以睇到少少曙光,但好多同業已經陷入無以為繼嘅境地,要賣樓、賣巴士或抵押資產,都唔知可以頂得幾耐,加上疫下業務空間非常有限,人才大量流失成為業界頭痛問題,憂慮將來恢復通關,亦未必有足夠人手接待遊客。佢重申,旅遊業受影響係最快,但恢復係最慢嘅行業,喺業務尚未復甦之前,業界極需政府支援,以保留行業嘅骨幹人才。