政Whats噏：康復出關　陳家珮嘆病得辛苦

議員陳家珮上周染疫，經過連日來居家隔離之後，今日(14日)佢喺社交平台上載電子手環同連續兩日呈現無染疫嘅快測棒相片，宣布自己終於康復，可以重投工作崗位。佢喺染疫初期，雖曾指自己身體情況穩定，但其實係病得幾辛苦，實在唔好受咁話。

從相片中可見，陳家珮嘅快測棒係本月12同13日，連續兩日顯示無染疫嘅一條線。佢話今年3月接種第3劑新冠疫苗，相信體內嘅抗體已經減弱咗，豈料早前認為差唔多可以接種第4針疫苗嘅時候發現確診，真係唔好彩喇。

陳家珮係本月4日晚上做快測發現確診，並出現輕微發燒及喉嚨痛等病徵，於是呈報當局同埋進行居家隔離，直至今日宣布痊愈。