政Whats噏：踏入不惑之年　陳岳鵬：好戲在後頭

人大一歲，又老一年，即使話「年輕人」嘅定義愈來愈闊，但一去到「四十而不惑」嘅年紀，無論點講人生都已經過咗一半。尋日(14日)迎來四十歲生日嘅政制及內地事務局前副局長陳岳鵬，就似乎無意認老，仲喺社交平台細數過去種種經歷，指人生上半場過得好充實，對於「轉字頭」充滿期待咁話。

常言道「人生如戲」，陳岳鵬枚舉人生上半場曾充當嘅社會角色，由童年讀書做學生哥開始，課餘參加童軍、搞班會，跟住留學、實習、參選區議會、進身官場、之後再進修、任職馬會、近年就愛上體育運動。佢話不停探索每種角色，可謂絕無冷場，仲好自豪咁講：I have lived my life to the full(人生過得非常充實)！又話感恩上帝對佢不薄，加上親朋同師長嘅支持同鼓勵，令佢有勇氣去嘗試，有力量去做一個更好嘅自己。

穿上2019年樂施毅行者「戰衣」嘅陳岳鵬，一手捧住生日蛋糕，一手舉起4隻手指，話自己之前嘅四個十年，一個比一個特別，一個比一個有趣，所以佢肯定更精彩嘅好戲，還在後頭。照佢咁講，莫非預告人生舞台將另有新角色？