政Whats噏：斷食3日　黃均瑜辟穀養生

除咗食療進補，辟穀斷食都係一種養生方法。香港教育工作者聯會會長黃均瑜，間中都有進行斷食，而日前更創下佢嘅個人紀錄，一口氣斷食74.5小時！超過三日粒米不進，到底佢有無餓到頭暈眼花呢？

答案出乎意料，黃均瑜精神奕奕，感覺良好，仲打算搵機會連續五日斷食添。佢話24小時內禁食16個鐘嘅168斷食法，時下相當流行，只要再步一進就可以斷食一整日;其實過咗24小時之後，飢餓感覺並唔強烈，所以佢上次斷食，輕輕鬆鬆咁就48個鐘。黃均瑜又提到斷食期間須補充水分，亦可飲用熱量輕微嘅飲品；雖說斷食期間不宜劇烈體力消耗，但唔代表陷入靜止狀態，路程約兩小時嘅短途行山，絕對無問題。但為咗穩陣起見，都要帶些少食物傍身。

至於斷食嘅習慣，黃均瑜係由去年年尾開始，但礙於社交應酬，至今斷食咗4次。而每一次都令佢感到腸胃得到休息，整個人都輕鬆咗、精神咗。不過能否進行斷食則因人而異，事關停止進食一段時間，係有機會出現血糖過低嘅現象。