政Whats噏:陳沛然潑「0+7」冷水 全面放寬更可取

20220919
東網電視
更多新聞短片
陳沛然指「0+7」方案可能會激起港人出門消費嘅意欲,而非留港消費。
為咗邁向商貿開放與經濟復常,有傳政府打算放寬入境檢疫要求,將目前俗稱「3+4」,即3日酒店隔離、4日醫學監察,改為毋須酒店隔離嘅「0+7」方案。醫學界前議員陳沛然尋日(18日)喺社交專頁貼文,質疑「0+7」方案嘅成效,指入境人士即使免除酒店隔離,但仍然受到諸多限制,難以激起外國遊客訪港意欲之餘,更會促使港人出門消費咁話。
就香港嘅防疫政策,陳沛然一向都有佢嘅睇法。早前佢就以「魚與熊掌」嚟形容香港同內地及外國通關,結果就落得「兩頭不到岸」嘅下場。佢話「0+7」不等於零,事關7日嘅醫學監察,入境人士須每日做快速抗原測試,又要做幾次強制拭子採樣核酸檢測;仲要受到「疫苗通行證」、同埋「黃碼」嘅限制。就算嚟到香港呢個美食之都,亦要餐餐啃外賣。佢反問呢啲措施,會否令外國旅客望而卻步?
但對於有意出門嘅港人而言,返港後毋須酒店隔離,變相令外遊成本大降。因此陳沛然推斷,屆時可能會出現港人報復式出門旅行消費,以致下次假期時香港更少人,跟住佢又喺另一則貼文,指外國足球賽事,球場幾萬觀眾密麻麻唔戴口罩,又飲又食、又無強制快測同核酸檢測、又無紅黃碼。雖然佢無提出勝過「0+7」嘅方案,但全面放寬嘅要求,可謂溢於言表。而唔少網民亦認同佢嘅見解,有人留言話只要繼續強制任何地方戴口罩,掃安心出行,掃針紙至可以幫襯堂食或者去酒吧,誰會來香港旅行?
日前從歐洲回港,今日(19日)仍喺酒店隔離嘅灣仔前區議員梁柏堅,就以外國遊客嘅視點,預計實施「0+7」之後所面對嘅情況。佢話上飛機前必須做核酸檢測,而檢測嘅費用就相當於一程歐洲廉航機票嘅價錢,仲要填網上健康申報表,取得綠色二維碼先至有得上飛機。入境之後就要下載強制檢疫令,到達下榻地點之時又要登記醫學監察系統,跟住未來幾日都要量體溫、做快測,將結果上載至系統之餘,隔日要到社區檢測中心排隊做核酸檢測;至於下載各大外賣流動程式,出街要戴口罩,所到處都要用「安心出行」打卡,更不在話下。佢話莫非外國人唔怕麻煩都要嚟香港旅遊?唔好發夢啦!