政Whats噏:冀社會復和 管浩鳴倡案底封存

20220922
東網電視
更多新聞短片
梁熙(左)同管浩鳴(右)嘅地區聯合議辦開張。(徐家浩攝)
議員梁熙與管浩鳴(管牧),兩人喺筲箕灣愛東邨嘅地區聯合辦事處今日(22日)開幕,然而誌慶活動就一反「切燒豬」嘅傳統做法,改為上樓家訪以體現「行動型」嘅社區服務。由於某受訪住戶談及青少年問題,管牧就想起唔少留有案底嘅後生仔,社會都應該畀機會佢哋重新做人,又指內地將案底封存嘅做法,值得香港借鑑。
管牧解釋,所謂案底封存,即犯案紀錄只存放於法院,只有犯罪或刑事偵緝過程中,有關機構才可查閱,除此之外係唔會睇到。變相令少不更事,或畀人誤導而犯案嘅青年人,有迷途知返嘅機會。但若果重蹈覆轍,一錯再錯的話,存放於法院嘅案底就會再呈交。管牧強調,做法並非既往不咎,之不過若有人真心悔過,就應該給予洗心革面嘅機會,而不論涉及2019年嘅社會事件,還是其他罪行,否則永遠留有烙印,等如迫佢哋埋牆角,況且後生仔即使曾經犯錯,畢竟都係港人嘅子女啊!
講返今次議辦開張,梁熙話佢同管牧已非首次合作,之前已經同對方合組唱歌嘅男團。由於管牧唱慣聖詩,所以做主音,而佢只係做下和唱、和音之類嘅擔當;而接下來嘅做地區工作,亦都係一唱一和拍住上咁話。管牧就話男團希望可以湊足12人,成員除梁熙同李鎮強外,又邀來陳學鋒、李梓敬等議員加入,佢話疫情下街坊活動唔多,冀有機會「獻醜」以為坊眾提供一啲娛樂。