政Whats噏:網民紙包盒信寄謝展寰 環境局話未收到

2022年09月22日 19:02
東網電視
更多新聞短片
網民發起寄紙包盒畀環境及生態局長謝展寰。
位於元朗創新園、全港唯一紙包盒回收廠「喵坊Mil Mill」不獲科技園公司續約,環保署至今只係提供3塊政府用地,但選擇若非偏遠,就係屬於迷你用地,又或者係相喵坊未必可承擔嘅價錢。近日有網民發起致函行動,將紙包飲品盒剪裁做「明信片」,又喺明信片寫上「#香港需要milmill」、「#這是可回收的」、「#這是postcard」嘅Hashtag,貼埋郵票寄去政府總部,收件人就係環境及生態局局長謝展寰。
最先提出寄紙包盒嘅網民「imsheeppoo」話,今次係自發行動,方法能夠令人人自己表達意見,爭取港府嘅關注,又提醒下周一(26日)嘅郵費就加價至2.2元。行動就吸引眾多網民響應,有網民就喺明信片度講,無咗Mil Mill就會買少9成紙包產品,希望當局可以為GDP向科技園爭取吓(續約)。
東網向環境及生態局了解,到底局長收到同睇咗「明信片」未?以及會否有新措施協助回收廠?局方話未收到信,睇嚟郵差叔叔派遞郵件要爽手啲,將「明信片」迅速送抵。