政Whats噏:地少民寡設施缺 葉劉:南丫島得不到重視

20220922
東網電視
更多新聞短片
葉劉淑儀(右)由登陸索罟灣嘅一刻,就聽聞南丫島須改善公共設施及社區服務嘅訴求。
南丫島雖屬本地遊勝地之一,然而民生設施同服務均呈匱乏。議員葉劉淑儀日前到訪南丫島,發覺島上嘅公共設施、社區服務都嚴重不足,譬如索罟灣只得兩名警察,健康院於星期一至六嘅日間只有一名護士當值,每星期只有兩日有駐場醫生會診。佢慨嘆島上居民只有數百,喺人口偏少嘅情況下,公共設施同服務都得唔到政府嘅重視。
到訪南丫島,係葉劉考察離島嘅行程之一,不過佢由索罟灣嘅模達灣碼頭登陸一刻,就聽聞碼頭長度不足以讓渡輪停泊,而必須進行改善工程嘅訴求。喺島上漫步嘅葉劉,又發現唔少街燈已嚴重老化甚至損壞,而部分街燈亦被大樹遮蓋,根本無法發揮照明作用。有島上嘅鄉事委員同佢講,曾向政府申請於索罟灣加設12支街燈,但至今仍未全數獲批,主因係某啲街燈位處保護區,礙於發展限制而無法成功申請。然而街燈係必要照明設施,對道路及行人路安全至關重要,希望政府酌情處理。
另一方面,前南丫石礦場發展計劃「爛尾」,島上居民亦甚有意見。話說該計劃涉及五十公頃土地,多年前由政府交予私人發展,但後來私人發展商嫌回報低並將計劃擱置。居民代表指南丫石礦場係珍貴平地應多加利用,應歸還政府另作發展用途。葉劉就承諾,定會深入了解該發展計劃為何擱置以及跟進索罟灣相關民生問題,冀島上居民有一個更宜居社區。