政Whats噏:A4設研究中心 目標提升議事質素

2022年09月23日 00:30
東網電視
更多新聞短片
楊永杰指成立研究中心目的係想提升議事質素。
立法會有唔少冇政黨嘅議員,但單打獨鬥係議會嘅作用有限,故大家都有自己嘅聯盟,一齊合作,但又並非以政黨方式存在。4名無黨派地區直選立法會議員組成嘅「A4」聯盟,就係其中一個例子,佢哋於今年6月組成呢個議會內合作平台,3個月時間,最新將會成立研究中心,專注研究政策事項,提升議事質素,並將於下月啟用運作。
A4成員包括議員楊永杰、梁文廣、林素蔚及張欣宇。佢哋以議會聯盟形成合作,強調並非政黨,而各自有分工,楊永杰主要負責醫療衞生、張欣宇負責鐵路及交通、梁文廣則係負責土地房屋、林素蔚負責福利及青年事務。不過,雖然唔係政黨,但都希望加強聯繫,增加各自議事能力。近期就在密鑼緊鼓籌備緊研究中心。
楊永杰表示,成立研究中心目的係希望專注研究政策事項,從而提升佢哋幾個嘅議事質素,而研究中心並非相當大型,只係大約由4至5人組成,當中有2人從地區調配,其餘幾人或再另外夾錢聘請。至於位置設係邊度?楊就話暫時計劃設於中信大廈13樓嘅議員辦公室公眾區域,若真係冇位,再另尋其他地方咁話。
但研究中心第一個研究項目係啲咩?楊永杰指,首先研究的將會係北部都會區嘅發展方向及設計,包括香港產業發展問題,以支援新界北議員張欣宇。被問到研究中心是否一個月作一次研究報告?楊則指並冇硬性要求,主要視乎當下有何議題,以及同事能力,未來按照4人嘅分工,集中作數據分析及政策研究。
另一邊廂,張欣宇所屬嘅組織「香港新方向」將於下月22日於荃灣南豐紗廠舉行3周年聚會,現時做緊內部裝修嘅天水圍大型辦事處亦將在同月開幕。過去有不同政治光譜人士加入新方向,包括建制甚至前民主派。據了解,張現時持續招攬各派人士加入,其開出嘅條件亦相當可觀,相信此舉同樣係想擴充實力。