政Whats噏:儲肥大閘蟹 黃定光:蛋白溝芝麻

2022年09月23日 15:49
東網電視
更多新聞短片
黃定光話大閘蟹不可長期捱餓。
日前有內媒報道指,廣東佛山市兩名年幼兄弟,將父親購買嘅大閘蟹當作寵物飼養,豈料放學回家,發覺「寵物」竟遭煮熟,兩兄弟當場崩潰!消息不但惹來網民熱議,更引伸另一問題:飼養大閘蟹,究竟要餵飼乜嘢食物呢?進出口界前議員黃定光(象哥),昔日曾任職國貨公司,熟悉大閘蟹嘅銷售流程。佢話大閘蟹嘅飼料好簡單,就係蛋白溝芝麻。
雖然蟹別稱「無腸公子」,然而不可長期捱餓。象哥話大閘蟹一旦來貨過多,店面雪櫃不敷應用嘅時候,就會將餘下嘅大閘蟹放置喺廢紙房,鬆綁予其自由走動。為保持大閘蟹豐腴嘅肉質,要將生雞蛋嘅蛋白同芝麻混合並置於碟中,大閘蟹就會自動埋位進食。不過象哥又補充,話咁做只可維持三日,畢竟只屬權宜措施,同大閘蟹嘅生長環境始終有別咁話。
講起生長環境,象哥就提到近年市面有售嘅荷蘭大閘蟹。佢話原屬江蘇特產嘅大閘蟹,因過去有商船喺歐洲排放,啟航前於長江口所汲取嘅壓艙水,結果壓艙水內嘅大閘蟹蟹苗就此「移民」歐洲。雖然彼邦嘅生態環境適宜大閘蟹繁衍,不過論味道,象哥都係覺得江蘇一帶出產嘅大閘蟹比較啱胃口。