政Whats噏:年輕人口減 吳傑莊:房屋問題是硬傷

2022年09月23日 16:30
東網電視
更多新聞短片
吳傑莊指香港嘅人口結構出現好大問題。
香港作為國際都市,人口流動頻繁,然而一年之間淨移出嘅居民竟高達6位數,無論如何都唔係好現象。議員吳傑莊日前出席網台節目,提到人口政策會牽涉到住屋、教育、醫療,甚至乎產業發展,幾乎所有嘢都關事。然而低出生率加上移民潮,就令到本港嘅人口遜於預期。如何令到年輕人對香港有歸屬感同埋吸引人才,除咗要營造更多青年人上流嘅機會,亦要改善居住環境,畢竟房屋問題係香港嘅「硬傷」。
吳傑莊指社會發展亟需人才,即使內地也好、海外也好,甚至乎本港,都積極吸引年輕人,事關人才愈年輕愈有利,譬如深圳嘅人均年齡不足30歲,同香港相差十幾年。其實香港嘅人口結構出現好大問題,佢話政府曾推算2024年嘅香港人口應該有780萬,而事實係今日嘅數字只得720多萬;其中16至35歲人口,10年前約88萬,今日只得50多萬,即係話最黃金、最有拼勁嘅年齡層人口唔見咗30萬。
早前政府公布,本港婦女生育率跌至歷史新低,僅得0.87。吳傑莊指本港一年嘅新生嬰兒約3萬至4萬,要彌補不足嘅人口數字,吸引年輕人來港係其中一個方法。雖則大學可以吸引優才來港讀書,完成學業可以留港發展,貢獻社會,然而呢個如意算盤,可能因居住環境而打唔響。童年曾短暫住過劏房嘅吳傑莊,指劏房環境對小朋友嘅成長同學習都唔係咁理想。所以佢希望10年或更短嘅時間,小朋友可以唔使住劏房。要達到呢個目標,就要增加土地供應、加快規劃流程,而基建方面比較齊備嘅郊野公園邊陲地帶,亦值得考慮開發。
講起住屋,吳傑莊認為政府係有責任令到市民住得好。譬如新加坡嘅組屋,當地大學畢業生組織家庭,就會有一間組屋,日後若果生小朋友,間組屋仲可以有一次升級機會。吳傑莊大讚組屋制度「人性化」,值得香港借鑑,因為香港要有長遠發展,有賴青年人願意生育下一代,然而生兒育女,首要條件係安心成家。之不過香港嘅現實係通貨膨脹、樓價高企,佢話曾經有同事要求唔好加薪,以免超過申請公屋嘅入息限制,令佢不禁慨嘆為求容身之所,「人望高處」嘅志氣不再,真係不可思義咁話。