政Whats噏：教育局副局長施俊輝　月中已向新民黨申請退黨

新民黨無論喺新一屆立法會或政府，其勢力都持續壯大。但另一邊廂，作為新民黨黨員嘅教育局副局長施俊輝就選擇退黨。教育局表示，施俊輝已於本月中向新民黨遞交退黨申請，他衷心祝願新民黨黨務蒸蒸日上，未來發展更進一步、再創高峰。副局長未來會繼續加強與各政黨、立法會議員、地區及社會各界人士的溝通聯繫，期望促進全方位協作，推動本港教育向前發展。

原先擔任教育局局長政治助理嘅施俊輝，今年7月22日獲政府委任，「升呢」做副局長，然而新民黨黨主席葉劉淑儀向傳媒透露，並冇推薦施俊輝做教育局副局長，仲話唔記得佢係黨員，好耐無來往，話對方係向政府毛遂自薦。

即使施俊輝退黨，新民黨喺今屆政府管治團隊中仍有4名黨員，包括發展局政助黃詠儀、創新科技及工業局局長政助廖添誠、勞工及福利局局長政助傅曉琳及運輸及物流局政助陳閱川。喺立法會層面，新民黨由上屆2席，今屆增加逾倍至5席；主席葉劉淑儀就喺今屆政府擔任行政會議召集人。