政Whats噏:容海恩率先受惠「0+3」 今早離酒店即返立會

2022年09月26日 12:52
東網電視
更多新聞短片
容海恩兩公婆尋日喺菲律賓返港。
港府由今日(26日)起放寬入境檢疫措施,由「3+4」改為「0+3」。議員容海恩(Eunice)早兩日已經講過自己同丈夫袁彌昌會係首批受惠者,佢哋尋日(25日)喺菲律賓返港,隨即入住檢疫酒店,由於新措施今日生效,佢哋今晨獲准離開酒店。Eunice話返屋企放低行李、換咗件衫就趕返立法會做嘢,仲話期間同大女傾咗一陣偈,事關當時囡囡同工人去咗公園玩。
Eunice對傳媒話尋晚喺酒店已收到通知話可以喺今朝離開酒店,本來最早6點幾就可以走,但怕人多,所以喺酒店食完個早餐,約莫10點左右先走。雖然返咗立法會做嘢,但由於「黃碼」期間唔能夠去食肆用膳,所以佢下晝2點左右就會返屋企,又話在家健康監測未必會減少同囡囡嘅接觸,事關返港後要隔日做核酸檢測,都幾安全,最緊要避免去人多地方就得嘞!
趕返立法會做乜嘢?佢話係準備下月初「促進粵港澳大灣區發展事宜小組委員會」會議,兼且同相關團體線上會面,稍後仲要返律師樓為本周三上庭嘅一宗案件做預備工作添!受惠於政策放寬,佢話有部分本來去唔到嘅活動都可以去返喎。