政Whats噏:陳健波出關 寄語:平日要對老婆好啲

2022年09月27日 21:05
東網電視
更多新聞短片
陳健波話感謝太太照顧。
近排有多名議員中招,需要家居隔離,當中包括身兼行政會議成員嘅保險界議員陳健波。波哥已經康復出關,仲拍咗段片話叫大家「平時真係要對老婆好啲」。
隔離7日先知老婆好?咁又唔係,而係有更深體會。波哥話老婆同工人因為同住,屬於密切接觸者,佢哋都唔可以離開屋企。雖則唔知老婆點安排,唔計早餐,7日總共14餐,每餐都有兩餸一湯,全部都係家庭餸,完全冇叫外賣嘅。照顧周到,佢話唔使知老婆點樣做到,只係需要感恩多謝佢,仲話所以做老公,平時真係要對老婆好啲。至於點樣做?佢諗大家都識做嘅。
波哥仲話新冠病毒好蠱惑,知道佢氣管差就專攻佢嘅氣管,所以佢冇發燒,只係喉嚨痛同咳嗽,開頭只係食中藥,但1日後仲係唔舒服,所以上咗醫管局HAGO登記同預婅網上睇醫生,醫生了解咗佢嘅病情、病歷同藥物之後,決定開輝瑞嘅特效藥畀佢,翌日就速遞送到佢門口嘞!佢話由於60幾歲嘅人,病情容易突然變差,醫生亦了解咗當時佢食緊嘅藥同特效藥有冇相沖,初時佢都有啲猶豫中西藥係咪適合一齊食,後來諗到內地都係中西醫結合,所以佢詢問咗自已睇開嘅中醫後,建議中西藥隔兩個鐘服用,隔咗一日就舒服好多,所以佢嘅結論係要信醫生,唔好堅持自己嘅偏見,否則後果可大可小喎。