政Whats噏:紅館意外 議員不滿楊潤雄拒見 促康文署交代

20220927
東網電視
更多新聞短片
有議員要求跟進紅館意外,不滿楊潤雄拒絕見面。
職場卸膊好常見,但如果連政府都係咁,市民往往有怨無路訴,咁又點樣做好人民公僕呢?講緊嘅就係社福界議員狄志遠早前去信特首辦,要求跟進及交代Mirror紅館意外事件,包括當中嘅調查成果,但有關信件竟然先被轉介至多個部門,好似玩程序咁。
事隔兩周,最終都係去番由特首辦回覆,但一味官腔無新意。狄志遠嘅黨友黃俊瑯就批評文化體育及旅遊局楊潤雄唔肯見面,連影都無埋,仲指係「一視同仁」,連其他議員都唔見。黃強調之後會再搵康樂及文化事務署跟進,唔會畀事件不了了之。
議員狄志遠早前去信特首辦跟進紅館意外事件,要求政府交代調查成果,但有關信件先被轉介至文化體育及旅遊局,局方其後又轉發畀康樂及文化事務署,而最後電郵竟交由1823代為接收,直情令人摸不着頭腦,亦都引起網民身有同感嘅經歷。
直至2星期後,政府尋日(26日)再次歎慢板回覆,以行政長官私人秘書名義向狄志遠發信,指跨部門工作小組正就Mirror演唱會事故進行調查,由於調查工作現仍在進行中,故未能於現階段透露有關調查詳情,待報告完成後,政府當局會交代調查結果及建議方案,避免發生同類事件。
之不過,回應無任何實際內容,搞到同樣有份向政府發信、狄志遠嘅黨友嘅黃俊瑯好唔滿意!佢批評文化體育及旅遊局喺成件事唔見影,搞到事件拋嚟拋去,局方無理由唔知個進展。至於文體局喺事件中有重要角色,但卻一不聞不問,應盡快出嚟交代。黃強調下階段會繼續跟進事件,要求康文署應定時更新調查報告,令公眾可以得悉進度。所以話呢將個波拋嚟拋去,但始終都要面對公眾㗎!唔舖康文署署長劉明光點拆招呢?