政Whats噏：華仁仔遇上皇仁仔　莫乃光同蔣濛有偈傾？

曾經係中學會考10優狀元嘅蔣濛，將於明年1月1日出任美國普渡大學（Purdue University）校長，前立法會資訊科技界議員莫乃光(Charles)日前就同蔣濛會面。到底Charles同蔣濛有乜關係呢？

依家經常喺英、美兩邊走嘅Charles日前專程同蔣濛見面，事關佢同呢間大學好有淵源。Charles喺1985年同1987年先後喺普渡大學獲電腦電機工程學士學位同電機工程碩士學位，之後仲留喺美國執業添！因校友嘅關係，所以Charles代表大學嘅香港舊生向呢位候任校長送上紀念品。而份紀念品係香港地圖。明明係香港華仁書院畢業(華仁仔)嘅佢，仲代表香港皇仁書院舊生對同係「皇仁仔」嘅蔣濛送上祝賀。

1977年喺內地天津出生嘅蔣濛，11歲隨家人到香港，入讀皇仁書院，1995年中學會考取得10科A，為當年皇仁4位10優狀元之一。現年僅45歲嘅蔣濛將於明年1月1日起，接替現任校長Mitch Daniels成為美國普渡大學第13任校長。