政Whats噏：李華明黨籍「解凍」　表明唔參與年底領導層換屆

民主黨元老、立法會前議員李華明(Fred)早前以個人名義，支持狄志遠參選立法會，被指違紀凍結黨籍半年，黨籍現已「解凍」，Fred話並無任何特別程序。對於該黨領導層年底換屆，Fred指佢哋冇諮詢過自己意見，自己亦唔會過多表達睇法。

Fred今日(4日)喺Facebook貼出一家三口喺2013年曼谷旅行嘅報章報道，透露自己11月將前往泰國曼谷旅行，係同太太慶祝結婚周年，4日3夜咁話。Fred指已2年多無出遊，現時終於有機會啦。

至於年底民主黨領導層換屆，佢又點睇？Fred指現時領導層並無就此事同佢傾過，佢亦冇咩要表達，稱自己依家只係一個「普通黨員」，交由年輕人自己決定。