政Whats噏:獄中鍛煉肌肉 胡志偉單腳站立

2022年10月06日 15:09
東網電視
更多新聞短片
胡志偉喺監獄裏面除咗不斷拉筋,仲有就係單腳站立。
因前年民主派35+初選案,涉違《港區國安法》而被還押嘅人士,鐵窗之下通常都會做下運動,前議員、前民主黨主席胡志偉都唔例外,話說佢喺監獄裏面除咗不斷拉筋,仲有就係單腳站立。而佢通常係一隻腳站立20分鐘,之後換腳再來。
前社福界議員邵家臻今早(6日)去荔枝角收押所探望胡志偉。胡見邵因痛風腳,行路一拐一拐,於是就鼓勵邵要保持做運動嘅習慣,以緩減肌肉流失。跟住胡就分享自己喺監獄裏面單腳站立嘅運動方法。講起做運動,胡出咗名係單車愛好者,往日更不時踩單車返立法會添。邵指胡即使身陷囹圄,仍關注有關單車嘅政策,認為單車係一種日常交通工具,因此唔可以淨係講單車徑,而係思考馬路上與單車共融。
邵又提到,胡每隔個多星期就剪一次頭髮,有時間會自行按摩頭皮,希望刺激毛孔,期望重獲自由之日,瘦咗靚左連頭髮都多埋!之不過要幾時至可以「放學」呢?胡就話只有等待判決結果。