政Whats噏:港防疫限制多又繁 黃傑龍被外國朋友問到唔識答

2022年10月06日 16:58
東網電視
更多新聞短片
講起香港林林總總嘅防疫措施,黃傑龍都覺得好複雜。
為回應邁向復常嘅社會聲音,本港嘅入境檢疫要求由上月尾放寬至「0+3」,亦同時取消檢疫酒店。但防疫限制依然繁瑣。繼桌球好手傅家俊尋日(5日)要花近一個鐘頭向一眾來港參賽嘅海外選手解釋「安心出行」嘅使用方法後,餐飲業行業培訓諮詢委員會主席黃傑龍今日(6日)亦喺社交平台貼文,話向外國朋友簡述疫下訪港需遵守事項,結果愈講愈長篇,對方聽到唔耐煩之餘,仲反問點解要咁做?搞到佢當場語塞。
話說黃傑龍日前透過網絡同一位外國朋友傾談,期間提及嚟到香港,避免罰款5000港元所必須注意嘅事項。佢先由簡稱「599」,即政府根據《預防及控制疾病條例》嘅相關條例背景講起,當提到「表列處所」呢個概念,如街市、超市、桑拿浴室、美容院、食肆、酒吧等,佢就發覺難以三言兩語簡單交代,畢竟貼上安心出行二維碼嘅地方,都唔一定屬於表列處所㗎!當然亦要講埋,邊度要戴口罩,邊度就唔使咁囉!
當講到疫苗通行證,佢就話有主動同被動查核嘅分別,仲會按唔同年齡層而有唔同嘅要求,異常複雜,唔用圖表實在難以清楚表達。佢又嘗試解釋公眾地方嘅4人限聚令,但食肆內反而可以一枱有8或12人,而一張枱嘅人數限制去到酒吧又唔同,當講到餐枱上面有食物就可以除口罩,企起身就要帶返個口罩嘅時候,佢話睇見對方一臉索然嘅表情,就知佢冇心機聽。
佢話本港疫情由第1波至第5波,由無疫苗到有疫苗,因應唔同情況嘅防疫措施不斷推出,即使本地人都覺得複雜,更何況係海外人士呢?佢話香港既然要邁向復常,向外國人交代本港防疫措施嘅篇幅就唔可以超過半頁紙,否則就唔好旨意海外遊客會對香港有興趣,所以佢建議醫務衞生局簡化近3年來嘅防疫要求同限制,只保留較關鍵嘅措施就夠。