政Whats噏:工會派新面孔出選勞顧會 林偉江坦言勝算不高

2022年10月06日 16:59
東網電視
更多新聞短片
林偉江聲言若進身勞顧會,冀推動最低工資一年一檢。(馮子健攝)
勞工顧問委員會下月將進行換屆選舉,工聯會權益委員會副主任林偉江將出選,擬接替現任勞顧會勞方代表鄧家彪(Bill)。林今日(6日)到海港政府大樓遞交報名表,被問到覺得勝算如何,係咪十拿九穩?佢就話未必咁樂觀,因為自己知名度不如阿Bill喎。
林偉江喺議員黃國等人陪同下遞交報名表。林話已經參與工會工作約20年,對職業司機嘅待遇感受尤深,覺得佢哋冇辦法分享社會經濟成果。如果有幸當選,希望推動最低工資一年一檢、改善職業安全條例。佢話勝算唔係十拿九穩,一來自己知名度唔高,二來都唔少新工會成立,對選情都有一定影響。
講到人力資源政策,佢話堅決反對擴大輸入外勞,強調政府要先完善本地工友嘅權益;要求政府帶頭取消外判,完善最低工資嘅機制,以保障基層勞工咁話喇。