政Whats噏：被問與江玉歡隔空駁火　吳秋北封口走人

話說議員吳秋北同選委會界別議員江玉歡尋日(8日)喺網上隔空駁火，江仲話吳嘅文章涉人身攻擊，對不實指控保留追究法律權利。事隔一日，吳今日(9日)出席一個公開活動後，被記者問到點睇呢件事，佢就「耍手兼擰頭」唔答喎。

吳秋北尋日喺社交平台貼文批評過往反中亂港分子用搶眼球、撈選票嘅伎倆，呢種歪風滲入議會，批評有議員「表演」、譁眾取寵，仲話要警惕添！全篇文章冇點名邊個議員，亦無講涉及邊件事。但之後江玉歡亦喺社交平台話明眼人都知係批評緊佢，向醫務衞生局局長盧寵茂問程序問題，話盧冇權力廢除免針紙，反問自己代表受影響市民做出一個直接質詢有乜唔妥，仲話面對呢種誹謗式嘅不實指控當然會保留一切追究嘅權利。

件事鬧到咁大，吳秋北今早出席一個公開活動後，在場傳媒就問佢點睇呢件事，但佢就揮咗兩下手話唔答問題，之後急急腳搭車走啦！呢兩位議員早前仲一齊開孖頭地區議員辦事處，之前吳仲話江係「好拍檔」添，唔知依家會唔會影響佢哋合作呢？佢下晝午出席另一活動時亦被傳媒問到有關事宜，佢就叫大家去睇文章啦，佢覺得文章已經好清楚同冇嘢補充。咁同江開嘅「孖頭」辦事處會點處理，佢就話開辦事處係為咗服務市民，所以就會繼續一齊合作喎。