政Whats噏：幫咗唔少人「起機」　方國珊嘆有人?完鬆

政壇人事離合，本屬尋常之事，惟當處理不慎，是非即接踵而來。西貢區議員兼任智庫組織專業動力召集人嘅方國珊（哪吒），似乎就陷入呢種漩渦。事緣哪吒日前喺社交平台貼文，感嘆栽培完人之後，「?完鬆」，的確唏噓。咦！係咪意有所指？但佢既冇開名，又冇講邊件事，究竟係話邊個呢？

仲記得行政會議召集人葉劉淑儀曾經話好多年輕人搵佢，「好多當我是跑道」作為升遷嘅機會。哪吒喺貼文話專業動力作為一個智庫，影響力雖然無傳統大黨咁大，但專業動力過去都幫咗唔少年輕人「起機」。佢形容大政黨就好似國際機場嘅規模，好多航班升降，飛得又快又隱，而佢就係一個小鎮、小鄉嘅的機場，規模雖小，但都起到機！跟住又寫「栽培完人後，『?完鬆』，的確唏噓。中國經常強調『不干涉別國內政』。我也希望互相尊重。」究竟發生乜嘢事呢？

話時話，哪吒曾5度出選立法會但落敗，舊年又因「家庭理由」棄選，改為推薦「徒弟」林素蔚出戰新界東南直選，林最終當選。有個「徒弟」入咗立會，應該有利專業動力拓展地區服務，但政圈耳言，話林素蔚入咗立法會後，曾盛傳佢同專業動力嘅關係有啲疏離。之不過，呢排都好少再喺社交平台見到佢哋一齊做地區服務，但日前佢哋都有出席香港新方向嘅3周年茶會，喺大合照中，見到佢哋坐到好遠。再講，哪吒嘅前助理、同為西貢區議員嘅張美雄，聯同西貢區議會議員張展鵬及前議員陳繼偉喺今年年初退出專業動力，仲另起爐灶成立智庫組織「民生圓桌」。

究竟「?完鬆」講緊邊啲人？哪吒回覆時話冇指任何人。咁係咪同林素蔚關係有變？佢就話林依家喺立法會列出所屬嘅政治團體係寫住專業動力嘅，再問係咪同張美雄等人退出有關？佢亦都係嗰句唔會指任何人，仲話依家專業動力都要搶人才，事關政府會發展將軍澳137區，所以佢哋就需要更多唔同專業嘅人才，又話佢哋嘅大門係長開嘅。