政Whats噏：憶起蘭桂坊悲劇　葉建源：我失去一個學生

南韓首爾龍山區梨泰院上周六深夜發生嘅萬聖節慶祝活動人踩人慘劇，造成逾150人死亡同逾130人受傷，事件隨即勾起唔少人對1993年元旦香港蘭桂坊人踩人悲劇，雖則已經過去咗29年，但逝者至親嘅傷痛仍揮之不去，包括教育界前議員葉建源。

唔少政界人士都喺社交平台都提及梨泰院慘劇，葉建源今日(31日)喺社交平台貼文，亦話「梨泰院嘅悲劇令人想起29年前嘅蘭桂坊。那一晚，我失去了一個學生，那麼年輕。這兩晚，韓國應該有許多許多人不能入睡⋯⋯」。相信好多人都深深體會到逝者家屬同親友嗰種椎心之痛。

慘劇亦再度惹起人流管制嘅關注，有議員話香港喺處理人群方面嘅隱憂，就係主要依賴經驗，但就「較少利用數據和科技」。咁市民又點應對人潮呢？前醫學界議員陳沛然就拋出「自救錦囊」，首先係唔好慌亂，跟住係避免摔倒，其他招數包括雙手握拳架喺胸前、順流而行、側身移動嘗試移離人群；萬一跌倒在地，側身蜷曲雙臂護頭。呢6招希望對大家有用。