政Whats噏： 立會宴會廳重開自助餐　收費平過以前

疫情雖未完結，但立法會宴會廳嘅自助餐今日(9日)「復常」，成為繼上個月重新營業嘅立法會餐廳，議員喺綜合大樓裏面食晏嘅另一選擇。然而物價飆升嘅當下，自助餐嘅取價竟然仲平過以前喎，每位收費都只係100港元咋！到底餐膳嘅質素有無將貨就價呢？

今次宴會廳係自疫情爆發以來，首次恢復「到會」形式嘅自助餐。就現場所見，宴會廳排列多個自助餐保溫爐，當中盛載火腿津白、蒜香翠玉瓜炒肉片、燒蜜汁一字骨、日式照雞扒等菜餚，又有適合秋天嘅雪梨無花果蜜棗豬骨湯；即使係素食人士，亦有乾燒伊麵同薑葱蠔油扒雙菇可供選擇，口味方面都算照顧周到；議員狄志遠指好多議員同事都興奮咗好耐，佢就覺得宴會廳嘅自助餐都幾好食；議員李鎮強同陸頌雄亦食指大動，但美食當前，李淺嘗即止，原因係減肥喎；陸就話以前嘅自助餐價錢係150港元，今次相對平咗。

不過議員邵家輝，就指宴會廳自助餐過往收費約200港元。話說上屆議會，有意幫襯嘅議員需事先夾錢，結果人數浮動不定導致自助餐嘅價錢亦有上落；依家就更改遊戲規則，議員即使唔食都要夾錢，帳面上食客人數大增，所以價錢可下調至一百元。邵又話立法會主席梁君彥，明日(10日)仲會請大家食自助早餐添。