政Whats噏：幫襯茶餐廳形容排隊人龍　葉劉：比核酸檢測還要擠擁

雖然茶餐廳係香港嘅地道飲食，然而老店買少見少，西環一間開業逾半世紀嘅茶餐廳將於本月底結業，唔少人都把握機會排隊光顧，身兼行政會議召集人嘅議員葉劉淑儀，就形容店外等候出爐麵包嘅人龍「似乎比核酸檢測還要擠擁」咁話。

即使人頭攢動，但幸好茶餐廳堂食尚餘少量位置，葉劉同友人得以到閣樓茶座用膳，緬懷店內洋溢老香港情懷嘅裝修同陳設。葉劉話老店嘅蓮蓉雞尾包、菠蘿包及蛋撻遠近馳名，而佢就點咗一杯招牌咖啡，以及最愛嘅蛋牛治。

葉劉同顧客及職員聊天，得悉東主嘅後人無意接手經營，好多人都慨嘆又失去一間老牌港式茶餐廳。儘管老店員工將要再謀工作，但因餐飲業極度缺乏人手，並無失業之慮。葉劉又祝茶餐廳老闆榮休後生活愉快，員工繼續有好嘅工作及發展。