政Whats噏: 巿建局推「小區復修」 楊永杰批小修小補無助解決問題

20221121
東網電視
更多新聞短片
九龍城區內有數百幢樓齡50年以上嘅「三無」大廈。
欠缺管理嘅老舊樓宇日久失修,問題長期困擾香港社會,市區重建局於九龍城「龍城區」進行規模較大嘅重建計劃範圍當中,打算試行鼓勵業主做好樓宇內外維修保養嘅「小區復修」先導計劃。議員楊永杰質疑先導計劃嘅可行性,形容市建局即使「出雞」,居民亦要出「豉油」,喺疫情重創經濟市道嘅當下,唔少基層市民仍然面對開工不足,張羅款項為樓宇進行維修,談何容易呢?
有關市建局「小區復修」先導計劃,除鼓勵業主做好樓宇維修保養,同時透過保育同活化工作,改善地區設施、街道環境及保存地方特色等,設想頗為美好。不過楊永杰就指出先導劃嘅首要難題,係須由業主立案法團申請計劃,然而九龍城區內有數百幢樓齡50年以上嘅「三無」大廈,即便市建局以「聯廈聯管」方式協助「三無」大廈成立法團,但相關業戶仍需分擔較高昂嘅管理費用,咁就難以提起居民成立法團嘅意願。
楊永杰又話,即使相關樓宇有業主立案法團,之不過,市建局就算「出雞」,居民難免都要付出「豉油」,然而疫下嘅香港經濟尚未恢復,最新失業率只係輕微下跌至3.9%,唔少基層仍苦於開工不足,法團嘅儲備根本不足以應付維修所需。佢話就算係普通市民,一提到「要自己出錢」,就即刻「耍手擰頭」,因此計劃不太受區內居民歡迎。
就令人頭痛嘅舊樓問題,楊永杰認為市建局與其小修小補浪費資源,倒不如加快收樓重建嘅步伐。楊永杰主張政府應將市建局借貸上限提高一倍,透過加大發債,獲取財務資源進行更多重建項目。