政Whats噏:愛駒首次報捷 陳浩濂贏現兜兜獎金

2022年11月24日 16:56
東網電視
更多新聞短片
陳浩濂遙距見證愛駒掄元奪魁。
財經事務及庫務局副局長陳浩濂周二(22日)出席活動,闡述政府對虛擬資產嘅睇法、相關政策同監管框架。翌日佢透過屏幕睇賽馬,目睹愛駒「日輝煌」於快活谷賽事首次報捷,實在大喜過望。儘管未能親赴現場拉頭馬,但可獲嘅獎金就高達六位數字,兼且係現金,唔係虛擬資產嚟。
雖則話「日輝煌」尋晚(23日)嘅獨贏賠率係5倍,屬次熱門,但過去曾多次出戰嘅「日輝煌」喺兩位資深騎師潘頓同莫雷拉策騎下,跑第二已經係最好成績,尋晚改由年輕騎師希威森駕馭即凱旋而歸,陳浩濂不但感到驚喜,就連佢嘅屋企人亦彈冠相慶,事關「日輝煌」嘅馬主唔止一人,係陳浩濂同佢爸爸陳兆安、以及兩位家人一齊養嘅。
點解陳浩濂無入馬場為愛駒打氣呢?原來尋晚佢要為活動擔任主禮嘉賓同演講,搞到9點幾先至完成公務,無法趕及愛駒喺9點15分開跑嘅賽事,惟有喺車上面睇直播,結果遙距見證愛駒掄元奪魁。