政Whats噏：鍾國斌卡塔爾現場睇世界盃　直呼過癮

正值世界盃，唔少人都透過直播觀看賽事。不過，前議員鍾國斌(Felix)就親身前往卡塔爾現場，觀看巴西對塞爾維亞嘅賽事，仲難掩興奮，直呼場波十分過癮，現場氣氛熱烈，好耐未試過叫到聲都沙埋！

Felix今日(25日)喺Facebook上載多張照片，分享到卡塔爾現場觀看世界盃，只見佢身穿今屆世界盃巴西球衣，豎起大拇指，睇落相當興奮。巴西首場對塞爾維亞，Felix話係必睇嘅一場！結果2比0勝出，一入波個個即刻彈起，佢自己都好耐未試過叫到聲都沙埋，覺得好過癮！Felix仲大讚現場氣氛high到爆，話全場有成8萬幾人，九成以上巴西球迷。

其實，Felix最近每日都喺Facebook發帖，分享自己係杜拜嘅旅遊經歷，包括觀看一級方程式賽車、參觀法拉利世界等，期間亦冇戴口罩，話當地已取消所有防疫及口罩規定，自己正享受毋須戴口罩及使用安心出行嘅時光。