政Whats噏：張宇人訪日　晤副外務大臣盼增商業合作　

行政會議成員、飲食界立法會議員張宇人，近日聯同商會代表出訪日本，與日本副外務大臣武井俊輔會面，唔知會面成果係點呢？

張宇人喺社交平台撰文，指雙方就加強兩地商業合作增加溝通。而日本外務省亦有發稿，指武井俊輔期待港日兩地放寬入境措施後，恢復交流，並強烈希望港府以科學實證為基礎，取消香港對日本食品同農產品嘅進口限制。除咗傾食品嘅議題，武井俊輔喺會面期間，亦對香港近期局勢表示強烈關注，重申希望香港喺一國兩制嘅框架下，保持自由開放。

而喺合照當中，亦見到環境運動委員會主席黃傑龍嘅身影，而佢早兩日前已經到達日本，仲指日本人同香港人一樣都好自律，事關當地即使冇規定，好多人都主動戴口罩，仲話自己除低口罩呼吸，已經係一種幸福。