政Whats噏： 同名同姓中醫　林琳憶確診治療經過

對抗新冠肺炎疫情，中醫都有其貢獻，議員林琳尋日(30日)喺社交平台分享一張朋友喺醫院拍攝嘅相片，可見中醫診症室門外寫住「林琳醫師」斗大四字，而佢嘅貼文就強調「真係唔係我嚟」，話自己當時正身處立法會議事廳。換言之，咁啱係同名同姓啫。

之不過，林琳話真係有唔少確診嘅巿民，復康之後睇中醫調理身體；而佢自己喺上月確診之後，一粒止痛藥都無食過；反而係發病初期服食兩劑中成藥，卡喺喉嚨嘅痰就容易排出；跟住又依議員同事黃英豪嘅介紹，以視像形式接受一位浸會大學中醫師遙距診症，並服用對方為佢煎煮，然後速遞上門嘅中藥，結果治療進度非常理想。佢話痊癒至今約半個月，身體恢復得好快，亦無新冠後遺症之慮。

雖然林琳大讚中醫「好掂」，但亦要注意中成藥嘅藥性，並非所有人都適合；譬如曾一度成為搶手貨嘅連花清瘟，其藥性較為寒涼，唔啱佢嘅體質。