政Whats噏:復辦壁球公開賽 邱達根話好彩有「0+3」?

2022年12月04日 19:53
東網電視
更多新聞短片
林順潮話唔記得咗自己確診過。(李志湧攝)
事隔4年大型體育活動嘅國際香港壁球公開賽喺近日舉行,身兼香港壁球總會主席嘅議員邱達根(Duncan)為咗推廣壁球呢項運動,今日(4日)仲親身落場同班港隊打波出戰名人賽喎。佢話喺疫情之下舉辦呢一類嘅大型體育賽事會增加成本,形容係「好危險」同埋「好搏」,幸好最終都能夠成功舉辦。至於近日疫情升溫,政府話唔排除會「走回頭路」,佢話希望可以繼續搞賽事,畢竟運動員生涯有限啊。
今次國際香港壁球公開賽囉,係繼香港國際七人欖球賽同香港桌球大師賽,又一體壇盛事。Duncan話該賽事已經停辦咗幾年,今次重新舉辦其實都「好危險」,因為疫情會令舉辦嘅成本增加,況且喺今年6月決定重辦賽事之時,防疫限制未見放寬,唔少海外運動員都話唔嚟。好彩後來放寬到「0+3」,多位世界頂級壁球運動員答應嚟香港作賽,場賽事先可以咁精彩咋。儘管有部分選手未因防疫措施放寬而出席賽事,但人數只佔一成左右,影響唔算太大,仲話有海外運動員同佢反映,「0+3」並無想像中咁嚴格喎。
最近疫情又有復熾嘅趨勢,政府話唔排除「走回頭路」,對此Duncan就唔希望無得搞比,事關運動員生涯有限,加上染疫身故嘅數字並唔高,期望盡可能繼續有比賽供運動員發揮。佢又話如果真係咁唔好彩,要關閉某啲運動場所或者推出一啲防疫限制的話,希望政府政策可以清晰啲,唔好再好似第5波疫情初期咁混亂,令人無所適從咁話。
至於今日場名人挑戰,除咗Duncan之外都有唔少政界人士參加,包括議員李梓敬、林順潮、前體育專員楊德強,以及金融管理局前總裁陳德霖。至於一眾本地壁球名將,當然唔會缺席。
林順潮雖然早前確診新冠肺炎,但賽事嘅表現可謂愈戰愈勇,由一開始落後畀李梓敬慢慢一球一球咁板平戰局,最後仲嚟咗個「逆轉勝」。賽後林順潮仲講笑話「唔傾開,啲人又無問,我都唔記得咗自己中過。」睇嚟佢不但徹底康復,並無「長新冠」等後遺症嘅困擾。