政Whats噏:法改會檢討成文法 多位議員倡法律條文要盡快去殖化

20221205
東網電視
更多新聞短片
陳曼琪話政府去殖化要有為。
香港雖然回歸25年,但處處都留有殖民地時期嘅影子,尤其係法律上仲會保留「女王陛下」、「英皇制誥」、「總督」等嘅字眼同說法,就住呢個問題,過去唔少議員都表達過不滿。法律改革委員會定期會就香港成文法進行系統性檢討,對於「法律適應化」嘅問題,喺今日(5日)嘅立法會司法及法律事務委員會上,好多議員都大吐不滿喎!
立法會今日就香港成文法作系統性檢討嘅工作進展進行討論,身兼法改會主席嘅律政司司長林定國就話目前略有成績,有7條法例或附屬法例已經完成適應化修改,2條法例嘅立法程序已經展開,有部分法例就要喺實施《基本法》第23條嘅工作中作出適應化修改,所以會採取「先易後難」嘅方式去推動修改。
但議員陳曼琪就有啲唔滿意,佢就話香港回歸25年,當然要捍衛香港憲法權威同特區憲制秩序,而且好多相關法律未能正確反映效忠對象,就好似第200章《刑事罪行條例》第5條係襲擊女王罪咁,就相當唔適合。林定國指,有啲條例牽涉到23條立法,一環扣一環所以就會搞得比較耐,不過陳曼琪就唔太滿意呢個回應,話呢個答案同以前政府冇乜分別,覺得政府雖然要周全去諗,但都要「有為」,要「斬釘截鐵」去做決定。
議員林新強亦都關注字眼問題。林提到,自己作為法律工作者,條文出現殖民化字眼喺實際操作上係冇咩大影響,但啲字眼真係「好肉酸」。佢又舉例第4章《高等法院條例》第6A條特委法官,影射近期黎智英請Tim Owen做代表,話近期有委聘非香港註冊律師做代表嘅案件,突顯呢啲有關條例要盡快修改。議員梁美芬都話字眼嘅修改事不宜遲,如果唔係普通人會「望多幾次全部入晒腦」,仲話依家法律援助要小心啲批,因為有啲人可能未符合法援資格,但因為話符合「公眾利益」所以批咗,會畀人覺得側重某啲案件,唔知係咪影射緊「長洲覆核王」覆核免針紙呢?
除此之外,議員周浩鼎就建議法改會要有時間表,定期公開進度比大家知咩情況。林定國話法改會係協調角色,政策性嘅改變都係要取決於決策局,法律改革委員會秘書長黃惠沖就話一定「走唔甩」嘅。不過議員江玉歡就話,如果主動權喺政策局的話,律政司係咪都要比較主動呢,林定國就話法改會過去兩個月都有優化工作方式,請求各位政策局官員坐低一齊傾嘅。無論如何,林定國就承諾會積極處理適應化,同大家交代成果。能否做到就要拭目以待啦。