政Whats噏:斥教育局政策死板 葉劉:派錢唔等於做到嘢

20221206
東網電視
更多新聞短片
葉劉話教育局派錢唔等於做到嘢。
政府本年度教育開支預算係1,119億港元,睇落個數額唔算少,教育局每年都有唔同措施要學校執行,但都有唔少人對香港嘅教育政策同體制不滿,教育前線工作更困難重重添!葉劉淑儀(葉劉)日前出席香港中學校長會周年大會時,更大鬧政府唔係一味靠派錢就可以解決問題,政策死板、唔肯溝通先係問題咁話喎。
政府投放資源、派錢畀學校,每年仲有唔同措施叫學校做,唔係好事咩?葉劉就話唔單止唔係好事,仲係增加學校行政負擔添!佢覺得教育局要明白到,派錢唔等於「做到嘢」,反而應該「源頭減廢」,令學校可以「休養生息」,專注真正嘅教育工作,培育年輕人,而唔係用錢買服務,而且如果服務提供者嘅水平良莠不齊,又會衍生其他問題。
葉劉仲話有校長反映教育局規條多,政策死板,例如唔容許學校喺中三開設獨立嘅物理科、化學科同生物科,只可以開設綜合科學科,間接遏抑同學嘅進步。規條多之外,葉劉亦收到風,話近年教育局減少咗同學校溝通,但就會繼續去問責學校,佢形容情況「極不理想」,一定會敦促教育局改善咁講。咁就拭目以待啦!