政Whats噏：陳志豪打3針　今年內3次中招

新冠疫情發展到依家，確診率都繼續高企。早排有唔少議員確診，而將軍澳北分區委員會副主席陳志豪尋日（5日）喺Facebook宣布自己確診，而且仲要係今年內第3次添！但佢話有啲嘢好奇怪喎，係咩呢？

陳志豪之前已經打咗3針，但竟然都中咗3次，距離上一次中就相差咗8個月。中咗咁多次，唔知對佢身體有冇影響呢？佢就話三次中嘅症狀都唔算嚴重嘅。唔單止打3針都中3次奇怪，仲有一樣嘢最奇怪，就係佢快測前後無論做幾多次，都顯示冇中，同佢食過飯嘅朋友同屋企人都話自己冇中，得佢一個做核酸先顯示中咗。

發生咗呢啲奇怪事，有網友同佢講話可以要求複檢，因為有時可能混檢所以搞錯，睇嚟佢都唔知可以咁做，仲好驚奇咁回覆「可要求的嗎？」嗰位網友都答話可以，叫佢打去熱線，說明唔同時間數次RAT都係冇確診，而且之前已中過2次，依家希望核酸複檢，佢就話試試先。一日過去，唔知佢有冇複檢成功呢？不過，佢似乎關心世界盃多啲，仲好開心咁話「8強有無可能係日本對韓國？」