政Whats噏：將藍隧道通車儀式　林世雄冇影　離港赴女畢業禮

話說將軍澳藍田隧道及將軍澳跨灣連接路（合稱將藍公路）今日(11日)通車，但係喺尋日(10日)嘅通車儀式，運輸及物流局局長林世雄就冇影喎，在場只見副局長廖振新。

呢個係今屆政府上任以嚟首個大型基建項目，主責運輸嘅林世雄都唔出席，究竟搞乜？運輸及物流局回覆傳媒話局長喺前日(9日)已開始休假，放到16日，即係本周五，期間要到海外出席女兒大學畢業禮。雖則佢唔喺香港，但尋日亦有寫網誌介紹將藍隧道同跨灣連接路啟用後嘅安排，仲話同事近日「如臨大敵」，但絕唔代表準備不足，局方希望市民能夠真切同充分感受到新基建帶嚟嘅裨益同幸福感。

資料顯示，將藍隧道喺2016年林世雄任職土木工程拓展署長時動工，佢當時都有出席動土儀式，當年政府預期2021年建成，終延誤一年至今日才開通。