政Whats噏：30年後重遊馬來西亞　聶德權：另一番風味

入境檢疫放寬到 「0+3」之後，唔少香港人都會去旅行，日本、新加坡、馬來西亞同韓國呢啲地方更加係港人首選啦！而公務員事務局前局長聶德權都唔例外，佢尋日（10日）就喺Facebook話喺事隔30年之後再次去咗馬來西亞，仲係自駕遊添！

聶德權話喺30年前去馬來西亞，就攀登咗4000米高嘅神山Mount Kinabalu，今次就玩下新嘢去自駕遊，路線就係由由吉隆坡去怡保、金馬崙高原、檳城，仲話自駕遊係「另一番風味」。此外，話說聶成日都會晨跑，連旅行都唔例外，佢話去到邊跑到邊，就分別喺擁有如 幻似夢般嘅「東方瑞士」美景嘅金馬崙高原同檳城晨跑，欣賞沿途美景咁話喎。

唔少網友見到聶嘅貼文，都紛紛留言，有網友話自己喺1986年去神山度蜜月、1993年都有喺檳城晨跑，聶就畀咗鼓掌同叻叻佢，亦有網友叫佢去食馬來西亞嘅榴槤同飲Kopi，佢都有回覆番張相顯示自己有食，睇嚟佢真係又食又玩喎。