政Whats噏：立會新會期委員會再洗牌　各黨派協調主席人選

立法會今年會期將於23日結束，尋日已完成最後一次大會，明年會期將於1月11日開始，意味住各委員會又將重新洗牌，立法會秘書處今日(15日)就發出各委員會來年會期嘅關鍵日期，包括加入委員會、提名正副主席期限及選舉會議日期等。睇嚟各政黨、聯盟又要展開新一輪協調啦。

今個月19日各位議員將會收到加入內務委員會、財務委員會、人事編制小組委員會及工務小組委員會嘅通告，並喺今個月30日中午12時前要示明加入委員會，之後隨即就內會及財會則率先提名正副主席展開提名，須於1月4日下午5時前提交，兩日後即1月6日進行選舉會議；人事編制小組及工務小組亦會喺同日發出提名通告，惟期限為1月9日下午5時，1月11日首次立法會會議前進行選舉。

至於各事務委員會方面，議員將喺今個月22日收到加入委員會通告，期限為1月6日下午12時。當委員名單敲定後，隨即展開提名正副主席，至1月13日下午5時結束提名，1月17日全日將進行委員會正副主席選舉。