政Whats噏：經民聯逛工展會　梁美芬掃蟲草　龍漢標買蜜糖唔知價

工展會開鑼，唔少市民都去掃貨，議員都唔例外喎。經民聯幾位議員今日(21日)去工展會「尋寶」，雖則議員梁美芬遲到，但佢首當其衝去掃貨。不過，買得最多嘅係議員龍漢標，幾樽蜜糖盛惠3,084蚊，買完仲唔記得幾錢添！

話說龍漢標中途離開大隊去買蜜糖，後尾問返佢幾錢，佢竟然唔記得，仲要睇返單添。梁美芬一入到工展會就買咗3盒蟲草、3盒靈芝，盛惠1,188蚊。

之後大家去到零食檔，眾人都買返啲喇！龍漢標再大手買入300蚊零食，話畀個孫嘅；梁美芬都唔執輸，同樣買300蚊；盧偉國就買咗240蚊，話返去邊啲世界盃重播邊過吓口癮；立法會主席梁君彥就買180蚊當支持喇！

另一議員陳祖恒，雖然買得80蚊零食，但就冇跟大隊走，話要自己「自由行」，見到啱嘅就再買多啲咁話啦！