政Whats噏：送舊迎新　江玉歡重遊故地　黃錦輝「行大運」

送走舊年、迎來新嘅一年。每個人都有唔同嘅方法，有人想重遊故地，亦有人想「行大運」，議員江玉歡(Doreen)同議會「新丁」黃錦輝都唔例外，唔好誤會，佢哋唔係一齊行，而係分別同自己嘅伴侶行，咁佢哋去咗邊呢？

Doreen話喺2022年最後一日，應該做自己最喜歡做嘅事，第一站佢就同老公去蘭芳園歎杯奶茶，有網友見到張相，就覺得佢老公「委屈」咗啲，講嘅係雙腳，要屈住坐木櫈仔，有啲辛苦嘞！而下一站，佢就去咗深水埗，因乜解究呢？原來深水埗係佢一年前選舉嘅起點，所以佢就希望同街坊見吓面、打個招呼，話要祝福新一年兒童活潑健康、長者健步如飛、打工仔同老闆們展歡顏咁話喎。

至於2023年嘅第一日，黃錦輝就去咗行山，由鹿頸、鳳坑、谷埔，最後返去起點，而且沿途可以隔着深圳河望住鹽田港添！新嘅一年行山，佢就話想「新年行大運」，祝佢心想事成啦！