政Whats噏：林超英重用月曆鐵線圈　有網民質疑係咪真環保？

踏入2023年，好多人屋企都要換日曆，就會造成好多浪費啦！一向係環保人士嘅香港天文台前台長林超英當然唔可以對呢啲情況袖手旁觀啦，所以佢就喺Facebook度就分享點樣可以用月曆入面嘅鐵線圈圈廢物重用。點知畀網民「將軍」，質疑佢係咪真環保？

林超英話其實月曆側邊嘅鐵線圈圈係大有用處嘅，因為可以用鉗將彎曲嘅部分拉直，變成稍後用來做小修理嘅鐵線材料。佢嘅貼文出街後，多名網友都有留言，分享重用鐵線圈圈嘅方法，有人就會拉直變成固定花盆嘅線，有人就話可以用來「紮阿仔對鞋」。

此外，亦有網友讚林超英嘅分享可以畀到廢物「二次生命」添！之不過，有網民就質疑，話佢如果係環保嘅話，點解要用帶有鐵線嘅月曆？咁係咪真環保，就見仁見智啦！