政Whats噏：開會食晏　盧偉國自製叉燒加餸

今日(11日)係2023年立法會嘅首次大會，眾多議員喺食晏期間，都有叉燒加餸。而佢哋之所以咁有口福，全靠議員盧偉國今朝一早起身，親自炮製十幾斤自家配方嘅「肥燶瘦蜜味叉燒」，單係睇賣相，就已經令人食指大動。

話說立法會早前恢復逢周三提供午膳嘅頭一日，盧偉國就以自製嘅叉燒為同事加餸，然而當日嘅私房叉燒數量有限，以致部分遲咗食晏嘅議員無緣美味。盧偉國有見及此，今日一於加大產能，咁就難免要犠牲些少睡眠時間，早啲起床整叉燒啦！至於今次私房叉燒所採用嘅材料可謂相當講究，盧偉國揀選本地豬農培殖嘅優質黑毛豬，醃製配方更花咗唔少心思，如何使用麥芽糖、烤焗溫度與時間亦累積相當經驗，難怪佢整嘅私房叉燒食落咁好味啦。

話時話，向來精於廚藝嘅盧偉國，今次選擇「肥燶瘦蜜味叉燒」嚟加餸係有意思㗎，佢係藉此向各位祝願家肥屋潤，甜甜蜜蜜咁話。