政Whats噏：拍住太太落區　柯創盛形容「反常的一天」

香港人出咗名鍾意返工，但係同「CEO」做嘢做足全日仲話好開心，就真係第一次聽啦！究竟咩事對足「CEO」一日都咁開心？答案係恩愛呀！

觀塘區議會主席柯創盛（柯仔）日前喺社交平台貼文，形容嗰日係「貼地又反常的一天」。而同佢對足一日嘅「CEO」並非工作上嘅上司，其實係佢嘅賢內助，即老婆大人，咁就難怪得對足一日，都甜絲絲咁啦！不過，佢哋今次唔係行街、睇戲同食飯，而係一齊處理公務喎，仲要出入都係搭巴士同坐港鐵添！咁究竟係太太同佢一齊做公務係貼地吖，抑或自己冇駕車係反常呢？

柯仔話兩公婆尋日去咗唔少地方做嘢，例如喺裕民坊出席食物環境衞生署舉辦嘅清潔香港活動，又約咗啲前輩飲茶，反正在座嘅前輩都係兩夫妻嘅共同朋友嚟嘅，咁啱自己嘅活動都需要人幫手影相，於是太太就充當攝影師嘞，變相「做咗日兼職議助」。

咁擔唔擔心會將公事帶返屋企？柯仔話向來都有同太太拍住落區做嘢，只不過就好少對足一日啫！