政Whats噏：訪新加坡堅持戴口罩　葉劉冀保處子之身

逾3年嘅疫情，雖則唔少市民都已經中過招，但總有人未感染過嘅，譬如身兼行政會議召集人嘅議員葉劉淑儀就係其中之一，且更被冠以「Covid Virgin」嘅稱號添！之不過，葉劉今日(13日)要出門前往新加坡出席論壇，據聞當地疫情嚴重，到底此行會否打破佢未曾確診嘅處子之身？

葉劉喺社交平台貼文，話自從2020年1月同女兒結伴到印尼峇里島度假後，至今已經近3年無出門啦。而今日出門前往新加坡嘅葉劉，係以史丹福大學商學院校友會成員嘅身份，出席該知名學府於當地舉行嘅首屆亞洲經濟論壇。而一同出席論壇嘅港方校友約2、30人。

3年來首度出門，心情當然興奮，但葉劉都悉聞新加坡現時疫情相當嚴重，有專家朋友提醒佢前往當地必須佩戴 N95 口罩，雖然係顯得有啲異相，但葉劉話定當遵從專家朋友嘅建議，以繼續保持零感染。為穩陣起見，葉劉今次出門只作短暫逗留，唔會探訪當地親友，論壇完結翌日就趕返香港。